Það kom aldrei til greina að Arnar Þór Viðarsson myndi taka við OB í Danmörku. Aðeins fyrirspurn um málið barst til KSÍ og málið var rætt.
„Það voru einhverjar þreifingar frá félaginu í gegnum millilið, það kom inn á borð okkar og Arnars. Það fór ekki lengra það. Það var ekki áhugi á því að ræða við félagið um mögulega ráðningu hans enda er verkefni hans nýbyrjað,“ segir Guðni Bergsson formaður KSí við Fótbolta.net.
Arnar Þór ætlaði í dag að velja leikmannahóp sinn fyrir komandi verkefni en hætti við á síðustu stundu, forföll vegna hina ýmsu ástæðu varð til þess að Arnar þurfti aftur að setjast við teikniborðið og velja hóp inn.
„Það var haft samband við KSÍ og spurt hvort það mætti ræða við mig. Ég ræddi það við Guðna og Klöru þegar þetta kom upp. Við vísuðum því svo til baka. Ég er nýbyrjaður í nýju spennandi starfi með A-landslið karla. Það er ákveðið langtímaverkefni sem ég tók að mér og þetta fór aldrei lengra en að vera einhverjar þreifingar. Það er alls ekki þannig að ég sótti um, ég hef aldrei sótt um starf á ævinni,“ segir Arnar við Fótbolta.net.
Í fréttum í Danmörku segir að það hafi komið til tals að Arnar myndi stýra bæði OB og íslenska landsliðinu en Jens Gustafsson frá Svíþjóð er einnig sagður hafa verið í viðræðum um starfið. Arnar Þór gerðist landsliðsþjálfari undir lok síðasta árs.
