Fimm leikjum er lokið það sem af er kvöldi í 2. umferð Bestu deildar karla. Aðeins leikur Stjörnunnar og FH er ólokið í umferðinni, en hann hefst eftir stundarkorn.
Í fyrsta leik dagsins vann Valur 2-1 endurkomusigur á ÍBV. Mikilvægt eftir tap gegn nýliðum Þórs í fyrsta leik. Lúkas Logi Heimisson og Hólmar Örn Eyjólfsson skoruðu mörk Vals eftir að Felix Örn Friðriksson hafði komið Eyjamönnum yfir.
Breiðablik tók á móti ÍA í hörkuleik en að lokum var það mark Höskuldar Gunnlaugssonar af vítapunktinum í fyrri hálfleik það sem skildi liðin að. Lokatölur 1-0.
Það þarf ekki að koma neinum á óvart að það var mikil skemmtun þegar KR tók á móti Þór í Vesturbænum. Amin Cosic, Eiður Gauti Sæbjörnsson, Luke Rae, Aron Sigurðarson og Ástbjörn Þórðarson gerðu mörkin í 5-2 sigri. Ingimar Arnar Kristjánsson og Isaac Atanga gerðu mörk gestanna en KR-ingar komust á toppinn með sigrinum.
Víkingur vann sterkan 0-2 sigur á KA fyrir norðan, fyrsti sigur Íslandsmeistaranna á leiktíðinni. Gylfi Þór Sigurðsson, af punktinum, og Elías Már Ómarsson skoruðu.
Loks vann Fram spræka Keflvíkinga. Vuk Oskar Dimitrijevic kom liðinu í 2-0 en Eiður Orri Ragnarsson minnkaði muninn fyrir gestina. Bjarni Páll Linnet Runólfsson innsiglaði hins vegar 3-1 sigur Fram.
