Á mánudaginn kvað dómstóll í París upp þann dóm að franska lyfjafyrirtækið Servier hefði gerst sekt um alvarlegt svindl og manndráp af gáleysi. Ástæðan er að megrunarlyf frá fyrirtækinu hefur verið tengt við mörg hundruð dauðsföll.

Lyfið sem um ræðir heitir Mediator og var þróað til að berjast gegn ofþyngd sykursýkisjúklinga.

Dómurinn kvað upp úr um að fyrirtækið beri ábyrgð á mörg hundruð dauðsföllum.

Lyfið var í sölu í 33 ár og um 5 milljónir manna notuðu það áður en það var tekið af markaði 2009 af ótta við að það gæti haft alvarleg hjartavandamál í för með sér. Tíu ár liðu frá því að áhyggjur af þessu voru fyrst viðraðar þar til lyfið var tekið af markaði.

Fyrirtækið hafði samið um að greiða bætur upp á 200 milljónir evra til notenda lyfsins áður en dómur var kveðinn upp.