Einar Bárðarson, framkvæmdastjóri Votlendissjóðs, minnist vinar síns, Eyþórs Hannessonar, í pistil í Fréttablaðinu í dag. Eyþór var einn upphafsmanna „plokk“menningarinnar á Íslandi og kallar Einar hann: „einhver merkasta hvunndagshetja sem Ísland hefur alið“

„Fyrir mörgum árum sá ég frétt í fréttatíma RÚV sem sagði frá undarlegu athæfi hlaupara á Egilsstöðum sem var farinn að gera sér það til gamans að tína upp rusl af vegkantinum og taka með sér heim á hlaupum sínum um héraðssveitina. Fréttamaðurinn var undrandi á þessu og flestir líklega sem sáu fréttina,“ skrifar Einar og segir Eyþór hafa verið byrjaður að plokka áður en það kom í tísku.

Plokkið barst hingað til lands mörgum árum eftir að Eyþór hóf að plokka frá Svíþjóð og varð Eyþór lykilmaður í samfélaginu. Nú eru um sjö þúsund plokkarar á Íslandi og er það að mörgu leiti Eyþóri að þakka.

„Hann fór fram með góðu og hvetjandi frumkvæði og smitaði stóran hóp samfélagsins til að koma og taka þátt. Fyrir nokkrum misserum veiktist Eyþór af krabbameini og þrátt fyrir bjartsýni, einurð og baráttu lést hann 20. febrúar síðastliðinn.“

Einar minnist félaga síns með hlýjum hug og sendir samúðarkveðjur á fjölskyldu Eyþórs.

„Eyþór var hvunndagshetja með hjarta úr gulli. Frumkvæði og dugnaður hans mun lifa í verkum okkar hinna og við getum treyst því að það er búið að plokka leiðina að og í gegnum Gullna hliðið ef það var þörf á því,“ en plokkarar landsins ætla að minnast hans á morgun, laugardaginn 6. mars, með því að plokka í nokkra poka hvert og deila því í hans nafni á síðunni Plokk á Íslandi á Facebook.