DV fékk ábendingu um umferðarslys við Urriðaholt í morgun og var haft samband við lögreglu. Sagði lögregla að um banaslys væri að ræða og að tilkynning kæmi inn seinna í dag.

Lögreglan sendi síðan frá sér tilkynningu rétt í þessu, þess efnis að karlmaður á áttræðisaldri hafi látist í umferðarslysi á gatnamótum Kauptúns og Urriðaholtsstrætis í Garðabæ í dag. Varð maðurinn fyrir bifreið er hann gekk yfir götuna. Lögreglu barst tilkynning um slysið rétt fyrir klukkan átta í morgun.

Lögreglan á höfuðborgarsvæðinu og rannsóknarnefnd samgönguslysa rannsaka tildrög slyssins, en ekki er unnt að greina frá nafni hins látna að svo stöddu.

Lögreglan biður þá sem kunna að hafa orðið vitni að slysinu að hafa samband í síma 444 1000, en einnig má senda upplýsingar í tölvupósti á netfangið helgig@lrh.is