Yfirvöld í Mexíkó hafa fram að þessu staðfest að 89.000 hafi látist af völdum COVID-19 þar í landi. En hin raunverulega dánartala er líklega mun hærri eða um 140.000. Heilbrigðisráðuneyti landsins viðurkennir þetta.

Fram til 26. september voru dauðsföll í landinu 193.170 fleiri en þau hefðu átt að vera í venjulegu árferði. Þetta er reiknað út með því að bera fjölda dauðsfalla á ákveðnu tímabili saman við fjölda dauðsfalla á sama tíma árin á undan.

Talið er að rúmlega 139.000 af þessum umframdauðsföllum tengist COVID-19 eða 50.000 fleiri en opinberar tölur segja til um. Yfirvöld hafa viðurkennt að ekki sé alltaf kannað hvort COVID-19 hafi orðið fólki að bana þegar lík eru krufin og dánarvottorð gefin út. Þau höfðu áður sagt að líklega hefðu um 104.000 látist af völdum kórónuveirunnar en viðurkenna nú að líklega sé talan um 140.000.

Mexíkó er í fjórða sæti yfir þau ríki þar sem faraldurinn hefur orðið flestum að bana. Bandaríkin eru í efsta sæti þessa lítt eftirsóknarverða lista með 225.000 dauðsföll. Brasilía kemur þar næst með um 157.000 dauðsföll og Indland þar á eftir með um 120.000. Mexíkó er í fjórða sæti með 89.000 dauðsföll en ætti kannski frekar að vera í því þriðja með 139.000 dauðsföll.