Samkvæmt drögum að lagabreytingum sem birtar hafa verið í samráðsgátt stjórnvalda ætlar Sigurður Ingi Jóhannsson, samgöngu- og sveitastjórnarráðherra, að færa málaflokk póstmála frá Póst- og fjarskiptastofnun til Byggðastofnunar. Byggðastofnun er á Sauðárkróki.

Aðeins örfáir mánuðir eru liðnir síðan Ásmundur Einar Daðason flutti brunaeftirlit Húsnæðis- og mannvirkjastofnunar til Sauðárkróks. Voru þar um að ræða átta opinberar stöður. Sögðu málkunnugir að verið væri að eyðileggja margra ára uppbyggingastarf deildarinnar, og lagðist ótti að sérfræðingum í brunamálum og slökkviliðsmönnum um að tilflutningurinn myndi bitna á brunavörnum og öryggi landsmanna.

DV sagði frá málinu á sínum tíma. HMS sagði við það tilefni að verið væri að „flytja“ stofnunina norður. Það orðalag reyndist yfirklór enda fluttist ekki einn einasti starfsmaður með. Lausar stöðurnar voru auglýstar og ráðið í þær í sumar og haust.

Þá sagði RUV frá því að sjö af átta flutningum opinberra stofnana út á land síðustu ár voru framkvæmdar af Framsóknarráðherrum. Framsóknarmenn voru ekki hrifnir af því að sú saga væri sögð af fréttamanni RUV og réðust af nokkurri hörku gegn fréttamanninum. Af lestri Facebook færslna Framsóknarmanna mátti helst skilja að um væri að ræða rugling hjá fréttamanninum á milli Norðaustur og Norðvestur kjördæmis. Baðst fréttamaðurinn afsöknar á þeim mistökum. Sigurður Ingi sagði þá jafnframt á Facebook að hann „hlakkaði til að lesa fréttir RUV af flutningi starfa af landsbyggðinni til Reykjavíkur.“ Ekki er vitað hvað ráðherrann átti við.

En, hvernig sem andúð Framsóknarmanna á ruglingi um landamæri norðurkjördæmanna tveggja líður, er hér um að ræða níunda flutning opinberrar stofnunar út á landsbyggðina á nokkrum árum, og í áttunda sinn er um að ræða Framsóknarráðherra.

Hægt er að skila inn umsögn um flutninginn á samráðsgátt stjórnvalda til 4. nóvember.

Póst- og fjarskiptastofnun hefur í áratugi haft eftirlit með framkvæmd fjarskipta, þar á meðal póstsendinginga, netöryggi o.fl. Segir í tilkynningu á vefsíðu Stjórnarráðsins: „Með tilfærslu póstmála frá Póst- og fjarskiptastofnun (PFS) til Byggðastofnunar er leitast við að tryggja jafnan rétt landsmanna til alþjónustu póstsins, sem lýst er í lögum um póstþjónustu.“ Þar segir jafnframt að starfsemi póstdeildarinnar muni sóma sér vel hjá Byggðastofnun, „m.a. við að samhæfa betur byggðasjónarmið og póstmála.“