Wesley Edens, einn eigenda Aston Villa, er sagður hafa verið fórnarlamb umfangsmikillar fjárkúgunar samkvæmt bandarískum saksóknurum. Málið tengist meintri hótun um birtingu einkamyndbanda úr svefnherberginu og gæti numið allt að 900 milljónum punda samkvæmt fjölmiðlum vestanhafs.
Edens, sem er 64 ára gamall milljarðamæringur og einn eigenda Aston Villa í gegnum fyrirtækið V Sports, er sagður hafa átt í sambandi við kínversku viðskiptakonuna Changli Luo. Þau kynntust árið 2022 eftir að Luo hafði fyrst samband við hann í gegnum LinkedIn.
Samkvæmt ákærunni hófust hótanir eftir fund þeirra í New York árið 2023. Luo er sögð hafa krafist helmings af auðæfum Edens og hótað að birta upptökur og upplýsingar um samband þeirra ef hann myndi ekki greiða henni.
Saksóknarar segja að Edens hafi á einum tímapunkti samþykkt að greiða henni um 4,7 milljónir punda eftir sáttaviðræður, en að kröfurnar hafi síðar hækkað gríðarlega.
FBI framkvæmdi húsleit á heimili Luo á síðasta ári þar sem fundust símar með myndefni og öðrum gögnum tengdum málinu. Hún var síðar handtekin á JFK-flugvelli þegar hún reyndi að fara til Kína.
Luo neitar öllum ásökunum, þar á meðal fjárkúgun og eyðingu gagna. Lögmenn hennar segja fyrri lögfræðinga hennar hafa gengið of langt í samskiptum við Edens.
Edens hefur verið einn af eigendum Aston Villa síðan árið 2018 þegar félagið lék í Championship-deildinni.
