Í gærmorgun hófust viðskipti í norsku kauphöllinni með hlutabréf í tæknifyrirtækinu Play Magnus Group. Magnus Carlsen, 29 ára, heimsmeistari í skák er einn eigenda fyrirtækisins og er það nefnt eftir honum. Óhætt er að segja að fyrsti dagurinn hafi farið vel af stað og var verðmæti fyrirtækisins komið yfir 1,1 milljarð norskra króna eftir tvær klukkustundir en það svarar til um 16 milljarða íslenskra króna. Viðskipti fyrir 22 milljónir norskra króna voru að baki þessu.

Upphafsgengi hlutabréfanna var 21 króna á hlut og var fyrirtækið metið á 800 milljónir norskra króna.

Play Magnus er byggt upp í kringum samnefnt app sem, og það kemur kannski ekki á óvart, gerir notendum kleift að tefla á netinu. Teflt er gegn gervigreindarforriti sem hermir eftir Magnusi.

Fyrirtækið var stofnað 2013 og setti appið á markað ári síðar. Það er í dag með 3 milljónir skráðra notenda, þar af greiða 35.000 áskriftargjald.