Fyrir aðdáendur The Walking Dead þáttaraðarinnar er rétt að taka fram að í þessari grein kemur svolítið fram sem gæti skemmt fyrir þeim varðandi söguþráðinn. Af þeim sökum er hér með sett fram Höskuldarviðvörun.

Þáttaröðin hefur notið gríðarlegra vinsælda en nú er komið að leiðarlokum. Framleiðslunni verður hætt eftir ellefu þáttaraðir. Enn á eftir að gera sex síðustu þættina í tíundu þáttaröðinni en hlé var gert á framleiðslunni vegna heimsfaraldurs kórónuveirunnar. Þessir sex þættir verða sýndir í byrjun næsta árs og í árslok 2021 hefjast sýningar á elleftu og síðustu þáttaröðinni og lýkur þeim í árslok 2022. 24 þættir verða í síðastu þáttaröðinni.

Variety skýrir frá þessu. En fram kemur að aðdáendur þáttanna þurfi ekki að örvænta því hliðarsería verði gerð í framhaldinu og verði tvær af aðalpersónunum úr þáttunum með í henni.

Hér er rétt að þeir hætti að lesa sem vilja ekki láta skemma söguþráðinn fyrir sér og er Höskuldarviðvörunin því endurtekin!

Nýja hliðarþáttarröðin er nú þegar á teikniborðinu og hefur verið ákveðið að Daryl Dixon og Carol Peletier verði aðalpersónurnar í henni. Þetta eru einu persónurnar sem hafa verið með í gegnum allar þáttaraðirnar af The Walking Dead.