Hagstofa Íslands hefur tekið saman upplýsingar um laun Íslendinga árið 2019. Meðalheildartekjur einstaklinga á Íslandi í fyrra voru 573 þúsund krónur á mánuði og miðgildi launa 473 þúsund. Með miðgildi er átt við að helmingur einstaklinga voru með meira en 473 þúsund á mánuði og helmingur einstaklinga með lægri tekjur en það.

Yngsti þjóðfélagshópurinn, þeir 16-24 ára, voru með langlægstu tekjurnar eða um 231 þúsund á mánuði. Að sama skapi var elsti hópur fólks enn á vinnumarkaði, þeir 55-74 ára, með hæstu tekjurnar eða 517 þúsund krónur.

Meðaltekjur þeirra á eftirlaunaaldri, eða 67 ára og eldri, voru 517 þúsund krónur, sem er talsvert lægra en meðaltalið í landinu.

Bendir hagstofan sérstaklega á samsetningu tekna, en tekjuskattskyldar hefðbundnar atvinnutekjur eru langstærsti hluti heildartekna einstaklinga. Fer hlutur þeirra hratt minnkandi með hækkandi aldri og þegar komið er í 74+ aldursflokkinn eru þær svo gott sem horfnar. Eykst á móti hlutur fjármagnstekna og bóta af heildartekjum jafnt og þétt með hækkandi aldri.

Sjá má nánari upplýsingar á heimasíðu Hagstofunnar.

Árétting: Í fyrri útgáfu var talað um meðallaun, en réttara þótti að segja meðalheildartekjur. Er það hér með árettað.