Í síðustu viku var lögreglan kölluð að heimili í Brisbane í Queensland í Ástralíu vegna látins manns sem lá í garðinum við húsið. Í ljós kom að hér var um 49 ára karlmann að ræða og er talið að andlát hans hafi ekki borið að með saknæmum hætti en niðurstöðu krufningar er þó beðið. Inni í húsinu fundu lögreglumenn tvo unglingspilta, 17 og 19 ára, sem voru læstir inni í húsgagnalausu herbergi. Þeir voru báðir með bleiur.

Mikinn óþef lagði úr herberginu og segir ABC News að piltarnir virðist hafa verið læstir inni í herberginu nær öllum stundum.  Á upptökum frá sjónvarpsstöðinni sjást piltarnir sitjandi á dýnum í annars tómu herberginu. Þeir voru vannærðir.

Haft var eftir nágranna að piltarnir hafi verið kallaðir „nöktu bandíttarnir“ því þeir hafi oft hlaupið naktir um í garðinum. Aðrir nágrannar sögðu að hinn látni hafi glímt við andleg veikindi.

Piltarnir, sem báru þess greinileg merki að vera mjög einhverfir, voru fluttir á sjúkrahús. Barnaverndaryfirvöld hafa nú tekið við máli þeirra.