„Við erum mjög sérhæft brugghús, líklega það eina í Danmörku, sem getur framleitt 90 prósent spritt í svona miklu magni og mér finnst að manni beri skylda til að bjóða fram krafta sína þegar yfirvöld auglýsa eftir spritti.“
Sagði Tørk Eskild Furhauge, forstjóri brugghússins, í samtali við Danska ríkisútvarpið.
Brugghúsið hefur úr nægu ókeypis alkóhóli að moða til framleiðslunnar. Það hefur sjálft lagt til alkóhól en það hafa einnig Carlsberg og Albani brugghúsin gert auk fleiri brugghúsa. Carlsberg sendi í byrjun vikunnar 17.200 lítra af Somersby í brugghúsið og verður þeim breytt í handspritt. Rétt er að taka fram að brugghúsin gefa vörur sínar. Nyborg brugghúsið leggur til aðstöðu og starfsfólk án endurgjalds. Furhauge sagði að þegar ástand eins og er núna komi upp þurfi að ýta öllum áætlunum til hliðar og hjálpa samfélaginu að komast í gegnum það.
Brugghúsið getur framleitt um 2.000 lítra af spritti á dag ef nægt hráefni er til staðar. Ekki veitir af því handspritt er orðið af skornum skammti víða. Venjulegt danskt sjúkrahús þarf um 1.000 lítra af handspritti á sólarhring. Þegar eimun er lokið í Nyborg brugghúsinu er sprittið flutt til fyrirtækisins Gundal í Billund á Jótlandi þar sem fullvinnsla þess fer fram og það verður endanlega að handspritti og er tappað á flöskur sem eru síðan sendar til sjúkrahúsa landsins.