Gunnar Bragi Sveinsson er hættur í Framsóknarflokknum og hefur dregið framboð sitt til baka. Þetta tilkynnti Gunnar Bragi í löngu bréfi á Fésbók nú fyrir skömmu. Gunnar Bragi sagði í samtali við Eyjuna fyrir skömmu að hann vissi að unnið væri gegn sér innan Framsóknarflokksins, síðustu helgi tilkynnti Ásmundur Einar Daðason um að hann myndi bjóða sig fram gegn Gunnari Braga í oddvitasæti Framsóknarflokksins í Norðvesturkjördæmi. Gunnar Bragi ætlaði sér í slaginn um oddvitasætið en hefur nú dregið framboð sitt til baka.

Sjá einnig: Gunnar Bragi: „Ég veit að það er unnið gegn mér“

Sjá einnig: Gunnar Bragi fylgir ekki Sigmundi: „Ég stefni á það að taka áskorun Ásmundar Einars“

„Þegar ég rita þetta þá sit ég með hnút í maganum enda ekki létt að hverfa á braut. Eflaust gæti ég unnið forsystusætið en hvað er unnið með því ef samstarfið verður óbærilegt? Er heiðarlegt að bjóða sig fram vitandi að allar líkur eru á að maður myndi hrökklast úr þingflokknum?,“

spyr Gunnar Bragi. Eftir að hafa ráðfært sig við fjölskyldu sína og vini hefur hann ákveðið að segja sig úr flokknum:

Ég kveð flokkinn minn með mikilli sorg en sáttur við framlag mitt til hans. Ég mun sakna alls þess frábæra fólks sem þar er en margir þeirra hafa verið mér samferða þennan tíma.

Gunnar Bragi vill ekki gefa upp hvað hann hyggst gera í framhaldinu, hvort hann gangi til liðs við Miðflokk Sigmundar Davíðs eða ekki:

Hvað ég geri nú er ekki ljóst en ég mun ákveða það næstu daga.