Davíð Smári Lamude, þjálfari Kórdrengja, var gestur í hlaðvarpsþætti Fótbolta.net í dag og fór þar yfir ýmis mál.
Kórdrengir eru félag sem flestir eru farnir að kannast við en liðið mun leika í 2. deildinni næsta sumar eftir að hafa komist upp tvö ár í röð úr bæði 4 og 3 deild.
Það eru reynslumiklir leikmenn á mála hjá Kórdrengjum og má nefna Einar Orra Einarsson og Albert Brynjar Ingason.
Hafliði Breiðfjörð ræddi ítarlega við Davíð um klúbbinn sem er mjög lítill að hans sögn. Þeir sömu eru á bakvið tjöldin og þegar félagið var stofnað fyrir 13 árum.
,,Félagið er eins og gefur til kynna ekki stórt og við erum ekkert margir sem vinnum að félaginu. Þetta er mikið bara við, fjölskyldan mín, strákarnir í stjórninni, nei þetta er ekki stór klúbbur en við hjálpumst öll að. Leikmenn eru að þvo vesti og annað, þetta er fjölskylduklúbbur. Það er stutt að fara til að fá hjarta liðsins beint í æð,“ sagði Davíð.
,,Við erum allir hérna sem stofnuðum liðið fyrir 12-13 árum. Karakter liðsins hefur verið sá sami öll þessi ár að undanskildu þessu eina ári sem ég talaði um áðan. Við erum virkilega lítill klúbbur.“
Davíð segir enn fremur að þetta hafi bara verið hobbí til að byrja með en að fljótt hafi gengið farið fram úr eigin væntingum.
,,Þetta var bara hobbí og fyndið. Við æfðum ekkert og spiluðum. Það gekk samt alltaf rosalega vel og ég held að enginn viti af hverju. Það var eitthvað við klúbbinn. Við æfðum ekki neitt og vorum jafnvel að lenda gegn stórum liðum í bikar, Víking Reykjavík. Við áttum skilið að vinna þann leik en töpuðum 3-2. Það var alltaf eitthvað.“
Margir spyrja sig hvernig Kórdrengir eru fjármagnaðir og hvernig félagið á efni á að sækja svo stór nöfn.
Að sögn Davíðs þá eru það aðallega auglýsingar á búningum liðsins sem sjá um að fjármagna þessa leikmenn og laun þeirra.
,,Ég þarf ekki annað en að benda á búninginn okkar í fyrra. Það sást varla í litinn á búningunum fyrir auglýsingum. Ég veit til þess að þeir sem voru að hringja og reyna að fá fólk til að auglýsa og annað, við þurftum bara að hætta.“
,,Eftir 10-20 fyrstu símtölin var búið að fylla búninginn. Fólk er spennt fyrir þessu og vill taka þátt. Það er eiginlega bara svar mitt við þessari spurningu.“
,,Við erum ekki með alla leikmenn á launaskrá eins og margir aðrir klúbbar svo þetta er fjölbreytt hjá okkur og öðrum klúbbum. Auðvitað finnum við fyrir því þessi klúbbar eiga erfitt með að borga laun. Við höfum fengið stráka til okkar sem eiga inni fullt af launum.“
