Í fyrsta sinn í sögu Hinsegin daga á Íslandi munu eikynhneigt fólk, eða asexual fólk, taka þátt sem ein heild. Fyrir þá sem ekki vita er eikynhneigð þegar fólk finnur einfaldlega ekki fyrir kynferðislegri löngun í aðra. Fram til þessa hafa eikynhneigðir ekki látið mikið á sér bera en nú hafa þeir stofnað samtökin Asexual á Íslandi og munu í fyrsta sinn ganga saman í Gleðigöngunni á morgun. Gyða Bjarkadóttir er meðlimur samtakanna, segir hún í samtali við Gay Iceland í dag að mikil fáfræði ríki um eikynhneigð bæði hér á landi sem og víðar:
„Við verðum ekki fyrir mismunun líkt og að geta ekki gifst, ættleitt eða eignast börn. Þetta snýr meira að vera ekki viðurkenndur hópur í samfélaginu,“
segir Gyða. Hún segir marga eiga erfitt með að skilja þá hugmynd að til sé fólk sem hafi engan áhuga á kynlífi. Það hafi gerst að eikynhneigðum hafi verið nauðgað til að „laga það“:
„Það eru einnig til dæmi um að eikynhneigt fólk hafi gert það sjálfviljugt til að mæta væntingum samfélagsins. Þó þeim langi ekki til þess, þá finnst þeim að það þurfi að gera það.“
Gyða segir mikið um misskilning í kringum eikynhneigð:
„Margir halda að það sé val, eins og skírlífi. Eða að þetta hafi eitthvað að gera með hormónaójafnvægi, geðsjúkdóm eða reynslu af kynferðislegri misnotkun. Þetta snýst ekkert um hræðslu við kynlíf eða sambönd. Að finna réttu manneskjuna lagar þetta ekkert.“
