Samkvæmt frétt Daily Mail hefur bandarískur listamaður, sem hefur margoft verið dæmdur fyrir málverkafalsanir, játað að hafa málað mörg verk sem hafa prýtt veggi hjá samtökunum. Eitt af verkunum var sagt vera eftir franska impressjónistann Monet og væri verðmæti þess 50 milljónir pundar. Það hefur nú verið tekið niður af veggnum hjá samtökunum.
En þetta málverk er ekki eina vafasama málverkið því einnig er nú efast um uppruna málverks sem er að sögn eftir Picasso og annars eftir Salvador Dali. Verðmæti þeirra tveggja er 54 milljónir punda samtals, það er að segja ef þau eru ekta.
Málverkin voru öll til sýnis í Dumfries House þar sem höfuðstöðvar The Prince‘s Foundation eru til húsa. Ásamt 14 öðrum málverkum voru þau fengi að láni hjá breska listaverkasafnaranum James Stunt sem er nú orðinn gjaldþrota.
Í síðustu viku var skýrt frá því að bandaríski listamaðurinn Tony Tetro hefði málað verkin og selt Stunt. Tetro sagði í samtali við Daily Mail að hann hafi gert það að lífsviðurværi sínu að líkja eftir verkum þekktra listamanna og selja þau.
Stunt vísar því á bug að málverkin séu fölsuð og því til sönnunar bendir hann á að þau eru tryggð fyrir 104 milljónir punda. Einnig á hin viðurkennda Wildenstein Institute í París að hafa staðfest uppruna myndana en stofnunin er þekkt fyrir sérfræðiþekkingu á þessu sviði.
