Haukur Örn Birgisson, hæstaréttarlögmaður, og eiginkona hans eiga von á eineggja tvíburum í lok janúar. Fyrir eiga þau tvö börn, sjö og níu ára.
Í bakþanka í Fréttablaðinu segir Haukur Örn að fréttirnar af væntanlegri komu tvíburanna voru honum „svolítið sjokk.“
„Nei, ég lýg því. Þær komu alveg flatt upp á mig […] Það breytist víst margt þegar maður eignast þriðja og fjórða barnið, sérstaklega ef það gerist á einni nóttu. Allt í einu verður húsnæðið ekki nógu stórt, bíllinn of lítill og allt gamla barnadótið kemur að engum notum. Það passar ekkert fyrir tvíbura. Allt þarf að vera tvöfalt,“ segir Haukur Örn.
Hann segir að tilhugsunin um að keyra um á sjö manna bíl vera hrylling. „Til að gagn sé að honum þá þarf hann víst að vera með rennihurð. Ekki skánar hann við það. […] Það er alveg ljóst að þetta er að fara að kosta mig að minnsta kosti 400 töffarastig – og á ég nú ekkert alltof mörg fyrir. Nýorðinn miðaldra, of þungur og að verða gráhærður. Strumpastrætó er líklegast það síðasta sem ég þarf á að halda.“
