Danska lögreglan sendi á föstudaginn frá sér aðvörun til almennings vegna hasskaka sem eru seldar í Kristjaníu. Þar er hægt að kaupa þær ódýrt og það gera margir, bæði heimamenn og ferðamenn. En að undanförnu hafa að minnsta kosti sjö manns veikst alvarlega og verið í lífshættu eftir að hafa keypt sér slíkar kökur.

Hér er um að ræða Dani, Japani, Spánverja, Íra, Þjóðverja og Bandaríkjamenn. Allt fólkið á það sameiginlegt að hafa keypt sér hasskökur í Pusher Street í Kristjaníu. Fólkið varð fyrir hjartsláttartruflunum, blóðrásin fór úr skorðum, sumir misstu meðvitund og aðrir fóru í ástand sem líktist geðrofi segja talsmenn Ríkisspítalans.

Allir sjúklingarnir voru útskrifaðir eftir einn til tvo daga á sjúkrahúsi.