Brynhildur Pétursdóttir, skrifstofustjóri Neytendasamtakanna á Akureyri og fyrrum alþingismaður, hafði mikla trú á Svölu Björgvinsdóttur Eurovision. Skömmu fyrir útsendingu RÚV í gær lýsti hún því yfir á Facebook-síðu sinni að hún myndi raka af sér hárið ef Svala kæmist ekki áfram upp úr riðlinum.

Eins og alþjóð veit sat Svala, sem og íslenska þjóðin, eftir með sárt ennið. Má segja að Þórðargleði hafi gripið um sig hjá vinum Brynhildar sem biðu spenntir eftir því að loforðið yrði efnt.

Brynhildur beið ekki boðanna og skellti sér í stólinn hjá hárgreiðslukonunni Evu Dögg í dag. Hún birti síðan mynd af afrakstrinum á Facebook-síðu sinni. Voru flestir vinir Brynhildar nokkuð sáttir með efndirnar en þó ekki allir. „Þessi pólitíkusar. Lofa einhverju. Og svo eru efndirnar eitthvað allt annað en maður bjóst við,“ sagði samherji hennar á þingi, Róbert Marshall.