Hollenski plötusnúðurinn Martin Garrix slasaðist alvarlega á ökkla á tónleikum í Las Vegas þann 25. maí síðastliðinn. Í tilkynningu á Facebook-síðu hans kemur fram að Martin þurfi af þessum orsökum að aflýsa fyrirhuguðum tónleikum næstu vikurnar.

Er þetta mikill skellur fyrir íslenska tónlistarunnendur þar sem Martin þessi er ein af skærustu stjörnunum sem áttu að koma fram á tónlistarhátíðinni Secret Solstice í sumar. Forsvarsmenn hátíðarinnar staðfesta í samtali við DV að Martin komi ekki hingað til lands vegna meiðslanna. Auk þess að troða upp á hátíðinni sjálfri sem fer fram í Laugardal dagana 21. til 23. júní þá átti plötusnúðurinn að skemmta á hliðarviðburði hátíðarinnar innan í sjálfum Langjökli föstudaginn 21. júní. Forsvarsmenn Secret Solstice segja að ekki hafi verið ákveðið hvort að sá viðburður falli niður eða hvort annar skemmtikraftur verði ráðinn í stað Martin.

„Ég er miður mín að þurfa að aflýsa þessum tónleikum því ekkert gerir mig hamingjusamari en að skemmta ykkur. Ég lifna við á sviðinu þegar ég sé ykkur brosa. Ég hlakkaði mikið til og mig langar aldrei að valda aðdáendum mínum vonbrigðum. Því miður hef ég enga stjórn á þessu,“ stendur í yfirlýsingu á Facebook-síðu plötusnúðarins. Hann bætir við að hann þurfi að gangast undir aðgerð, en ef hann myndi vanrækja það gæti það þýtt varanleg meiðsl á ökkla.

Martin ætlaði ekki aðeins að heimsækja Ísland í sumar heldur var búinn að auglýsa tónleika víðs vegar um Bandaríkin, Kanada, Spáni, Svíþjóð og Þýskalandi svo eitthvað sé nefnt.