Í dag, 11. mars, er dagur aðgengis fyrir alla haldinn hátíðlegur hér á landi og víða um heim. Í tilefni af deginum lögðu nokkrir stjórnarmeðlimir og starfsfólk skrifstofu NPA miðstöðvarinnar af stað í skemmtilega bæjarferð og heimsóttu nokkra staði sem hreyfihamlaðir hafa aðgengi að. En NPA miðstöðin heldur utan um málefni þeirra sem nota NPA þjónustu sem er þjónustuform sem byggir á hugmyndafræðinni um sjálfstætt líf og gerir fötluðu fólki kleift að ráða hvar það býr og með hverjum það býr.

Á ferð sinni tóku þau upp stutt myndbönd á nokkrum viðkomustöðum. Ein fór til dæmis í klippingu á hárgreiðslustofu sem býður góðan aðgang að vöskum, en gjarnan er óhægt um vik að komast í hárþvott eða litun þar sem aðgengi að vöskunum er takmarkað. Einnig var komið við í verslun þar sem nýlega hefur verið settur upp rampur til að auðvelda aðgengi fyrir hreyfihamlaða. Þá var komið við á kaffihúsi og í bíó og aðstæður þar kannaðar.

Rúnar Björn Herrera Þorkelsson formaður stjórnar NPA miðstöðvarinnar, fór á nokkra þessara staða. „Hugsunin með þessu var að vera ekkert endilega að taka fyrir staði með rosalega gott aðgengi heldur að sýna að það þarf ekkert alltaf rosalega mikið til að bæta aðstöðuna,“ segir Rúnar í samtali við DV.

Rúnar heimsótti meðal annars verslunina Álfastein í Hafnarfirði sem hann segir að hafi sett um góða en ódýra laust til að bæta aðgengið. „Rampurinn inn í verslunina kostar örugglega ekkert meira en 20.000, þetta er ekki fullkomið aðgengi, það til dæmis ekki sjálfvirkur opnaði á hurð, en við vildum sýna að það þarf ekkert endilega allt að vera fullkomið. Stundum þarf bara að gera smávægilegar breytingar til að staðir verði aðgengilegri.“

Myndböndin sem tekin voru í bæjarferð NPA miðstöðvarinnar má sjá hér fyrir neðan.

[youtube https://www.youtube.com/watch?v=dY8VT-8i3x4?list=PL5FD6ITveRhzZ1-8lVr8V_X0oAT2slFr0&w=560&h=315]