Fyrirsætan og sjónvarpskonan Lisa Snowdon er 47 ára og hefur ávallt haldið sér í góðu formi. Í viðtali við tímaritið Closer opinberar hún að hún noti ekki hnífapör og að það sé lykillinn að því að hún nái að hafa hemil á þyngdaraukningu.

„Ef ég nota gaffal þegar ég er svöng skófla ég matnum í mig eins og mannæta, en ef ég nota prjóna þá tygg ég meira og matartíminn er lengri. Það er góð aðferð til að plata sjálfan þig í að borða minna,“ segir hún og segist ávallt borða með prjónum í stað hnífapara.
Þá segist Lisa einnig forðast vigtina eins og heitan eldinn.

„Þær eru djöfullegar að mínu mati. Ég fæ svo mikla þráhyggju og hoppa á vigtina á ýmsum tímum dagsins,“ segir Lisa og bætir við að hún noti aðra leið til að sjá hvort hún þyngist. „Núna legg ég mat á hvort ég er búin að þyngjast út frá því hvernig fötin passa. Ef gallabuxurnar eru þröngar minnka ég skammastærðirnar og takmarka kolvetni eftir klukkan sex á kvöldin.“

Lisa sagði frá því árið 2015 að hún glímdi við þunglyndi og að hreyfing hjálpaði henni við að halda andlegri heilsu góðri. Þá hætti hún að borða kjöt í desember síðastliðnum.