Fyrrverandi forsætisráðherrafrú Breta, Samantha Cameron, situr ekki auðum höndum. Hún hefur snúið sér að fatahönnun og naut þar ráðgjafar einnar valdamestu konu í tískuheiminum Önnu Wintour, ritstjóra hins bandaríska Vogue. Samantha segir að föt sín séu þægileg og ætluð venjulegum konum. Fötin eru seld undir vörumerkinu Cefinn, en orðið er samsett úr nöfnum barna hennar. Börn hennar og Davids Cameron voru fjögur en sonur þeirra Ivan, sem var heilalamaður og flogaveikur, lést sex ára gamall árið 2009.
Um hin nýja feril sem fatahönnuður segir Samantha: „Ég vil ekki þurfa að líta til baka og hugsa: Þetta er það sem þig langaði alltaf til að gera en gerðir ekki.“ Hún hefur mikinn áhuga á tísku og hefur oft ratað á lista yfir best klæddu konur Bretlands. Eiginmaður hennar er sagður vera að rita endurminningar sínar en sinnir einnig barnauppeldi í mun meira mæli en áður, nú þegar kona hans hefur fundið sér nýjan starfsferil. Börnin þrjú eru á aldrinum sex til þrettán ára og eru að sögn Samönthu alsæl með að sjá meira af pabba sínum en á forsætisráðherraárum hans.
