Það er ýmislegt á heimilinu sem dregur í sig óhreinindi og bakteríur hraðar en annað og þessa hluti ætti að þrífa mun oftar en flestir gera. Hér má sjá dæmi um nokkra hluti sem ætti að þrífa á hverju degi – en samantektin birtist áður á Huffington Post.
Anddyrið á heimilinu er það fyrsta sem fólk sér þegar það gengur inn og getur haft áhrif á það hvernig þér líður heima hjá þér. Hengdu lyklana upp eða hafðu þá í körfu. Hengdu útiföt á snaga. Raðaðu skónum snyrtilega. Hristu af dyramottunni. Fyrir vikið verður þú mun afslappaðri þegar þú kemur heim.
Margir nota viskustykki til að þurrka hendurnar meðan þeir elda og þrífa og nota svo sama viskustykkið til að þurrka nýþvegna diska og glös. Þetta getur auðveldlega valdið því að bakteríur myndist í viskustykkinu og mikilvægt að þvo það reglulega á hæsta hita.
Svampar hýsa alls kyns óæskilegar bakteríur en þær má drepa með því að hita rakan svamp í örbylgjuofni í eina mínútu, stinga honum í uppþvottavélina eða sjóða hann í fimm mínútur.
Eldhúsborð og baðinnréttingar safna óhreinindum fljótt og örugglega. Því er best að þurrka af þeim daglega. Gott er að þrífa vaskinn vel í leiðinni. Ekki gleyma að hengja tuskurnar upp til þerris svo þær byrji ekki að úldna.
Fjarstýringar eru einn af þessum hlutum á heimilinu sem fæstir hafa fyrir því að þrífa en þær eru morandi í bakteríum. Það ætti að þurrka af þeim daglega og sama gildir um síma.
Þú leggur töskuna á gólfið á kaffihúsinu, hengir hana upp á almenningssalernum, lætur hana sitja á búðarborðinu, og skellir henni síðan upp á eldhúsborðið. Þú getur rétt ímyndað þér hverju hún hefur safnað að sér á leiðinni svo það er vel þess virði að strjúka vel af henni reglulega.
