Rithöfundurinn J.K. Rowling og Piers Morgan eiga það sameiginlegt að tjá sig iðulega á Twitter. Þeim lenti saman á dögunum og menn eru á einu máli um að Rowling hafi þar unnið yfirburðasigur.

Morgan hefur nokkrum sinnum tekið upp hanskann fyrir Donald Trump við mismiklar vinsældir. Einn viðmælenda Morgan sagði honum nýlega í beinni sjónvarpsútsendingu að fara til fjandans og Rowling lýsti á Twitter yfir ánægju sinni með þau orð. Morgan svaraði strax og sagði hana vera yfirlætis- og hrokafulla.

Á Valentínusardaginn birti Rowling stutta lofgrein sem hafði verið rituð um hana. Þar var henni lýst sem metsöluhöfundi sem verndaði einkalíf sitt og hefði hvatt börn til að lesa og vera skapandi. „Vildi sá sem skrifaði þessi orð gefa sig fram, ég vil svo gjarnan þakka honum,“ sagði Rowling á Twitter. Morgan brást strax við og sakaði Rowling um að vera á ósvífinn hátt að vekja athygli á sjálfri sér með því að birta um sig lofgrein.

Málið fékk svo óvæntan snúning þegar athygli var vakin á því að Morgan væri höfundur umræddar greinar. Árið 2010 hafði hann gert lista yfir fræga Breta sem hann taldi að skiptu virkilegu máli í samfélaginu. Þá setti hann Rowling í 97. sæti.

Morgan svaraði því til að hann hefði allan tímann vitað að greinin væri eftir hann, en sagðist jafnframt furða sig á því að hann hefði á sínum tíma sett Rowling svo ofarlega á listann.