Treyjur og fylgihlutir goðsagna Manchester United seldust dýrum dómi á uppboði á Englandi á dögunum.
Treyja sem David Beckham klæddist með Manchester United á sögufræga tímabilinu 1998-1999 seldist til að mynda á um 10 þúsund pund á uppboðinu.
Beckham notaði treyjuna meðal annars í leikjum gegn Arsenal og Chelsea á tímabilinu þar sem lið Sir Alex Ferguson vann þrennuna, ensku úrvalsdeildina, ensku bikarkeppnina og Meistaradeildina.
Á sama uppboði seldust einnig silfurlitaðir takkaskór sem Cristiano Ronaldo notaði hjá United fyrir 7500 pund. Skórnir fundust í rusli á æfingasvæði félagsins árið 2004 af starfsmanninum Tony Heywood.
Þá fór svört treyja sem Ronaldo klæddist í 1-0 sigri gegn Liverpool á Anfield árið 2005 á 14 þúsund pund.
