Lögreglan á höfuðborgarsvæðinu hafði í mörg horn að líta í nótt og er fjöldi mála skráður í málaskrá lögreglu. Á Seltjarnarnesi var meðal annars óskað eftir aðstoð lögreglu til að vísa unglingum úr gleðskap sem hafði farið úr böndunum. Ekki koma nánari upplýsingar um málið fram í skeyti lögreglu.

Flest verkefni lögreglu sneru að ölvun og voru nokkur dæmi um einstaklinga sem voru svo ölvaðir að þeir gátu ekki gefið upp nafn. Einn ofurölvi maður var handtekinn í miðborginni en sá gat ekki gefið upp nafn eða nokkur deili á sér. Var hann vistaður í fangaklefa. Annar var handtekinn í Hafnarfirði og sá þriðji í Seljahverfi í Breiðholti. Þar hafði leigubílstjóri óskað eftir aðstoð lögreglu þar sem farþeginn gat með engu móti sagt hvar hann ætti heima. Hann var vistaður í fangaklefa.

Nokkur fíkniefnamál komu upp og var einn handtekinn í Hlíðunum vegna vörslu fíkniefna. Málið var afgreitt á vettvangi. Þá voru fjjórir handteknir vegna nytjastuldar, vörslu fíkniefna og fleiri brota. Þeir voru allir vistaðir í fangaklefa. Tveir voru svo handteknir í Breiðholti í aðskildum málum; annar vegna líkamsárásar og hinn fyrir að fara ekki að fyrirmælum lögreglu og vegna brota á áfengislögum. Þeir voru vistaðir í fangaklefa. Þá var einn handtekinn í Árbæ vegna sölu og dreifingar fíkniefna.

Öllu þessu til viðbótar voru nokkir ökumenn stöðvaðir vegna ölvunar eða aksturs undir áhrifum fíkniefna. Mjög mikill erill hjá lögreglu og þá helst vegna ölvunar sem fyrr segir og voru allar fangageymslur á Hverfisgötu og Hafnarfirði fullar eftir nóttina.