Norska lögreglan rannsakar nú morðtilræði sem var framið í matvöruverslun í Osló í gær. Þar var kona stungin þar sem hún stóð við afgreiðslukassa og var að greiða fyrir vörur. Einn hefur verið handtekinn vegna málsins en það er karlmaður á þrítugsaldri. Hann er með rússneskt ríkisfang og kom til Noregs frá Svíþjóð fyrr um daginn.

Árásin átti sér stað í verslun Kiwi í Møllergata. Allt bendir til að tilviljun hafi ráðið því að þessi kona var stungin. Hún var strax flutt á sjúkrahús þar sem hún liggur enn en hún er í lífshættu. Norskir fjölmiðlar segja að maðurinn hafi sagt að hann vildi drepa fleiri. Norska ríkisútvarpið segir að maðurinn sé múslimi.

Hann var handtekinn skammt frá vettvangi skömmu eftir að lögreglunni var tilkynnt um málið.

Í áhættumatsskýrslum norsku leyniþjónustunnar sem og annarra evrópskra leyniþjónusta hefur undanfarið verið bent á hættuna sem stafar af einstaklingum sem munu hugsanlega fremja hryðjuverk sem þessi í Evrópu. Þeir eru þá einir að verki og ráðast á óbreytta borgara með það að markmiði að drepa þá.

Leyniþjónustan tók við rannsókn málsins í dag af lögreglunni.