Kaylee Rodgers, tíu ára stúlka á Norður-Írlandi, hefur vakið heimsathygli fyrir frábæran flutning á laginu Hallelujah sem Leonard Cohen heitinn gerði ódauðlegt á sínum tíma.

Kaylee er með einhverfu og athyglisbrest en í frétt Mashable, sem fjallar um málið, kemur fram að söngur hafi hjálpað Kaylee að öðlast meira sjálfstraust og sjálfsöryggi.

Myndbandið var tekið á kórtónleikum í skóla hennar nú skömmu fyrir jól og á því sést Kaylee leiða flutninginn á laginu á meðan kórfélagar hennar syngja bakraddir.

Þegar þetta er skrifað hafa um 2,5 milljónir horft á myndbandið á Facebook og aðdáun fólks leynir sér ekki. „Leonard Cohen hefði elskað þetta,“ sagði til að mynda einn í athugasemd sinni og fleiri taka í svipaðan streng. Og skólastjóri Killard House-skólans, þeim sama og Kaylee stundar nám við, er ánægður.

„Fyrir einhvern sem talaði ekki og gat ekki lesið fyrir samnemendur sína þegar hún kom hingað, þá er það ekkert annað en stórkostlegt að sjá hana syngja fyrir framan fullan sal af fólki. Hún hefur lagt mikið á sig til að komast á þennan stað,“ segir Colin Millar skólastjóri í samtali við UTV.