Andrea Cambiaso, bakvörður Juventus og ítalska landsliðsins, er sagður á óskalista nokkurra stórliða í ensku úrvalsdeildinni fyrir sumarið. Samkvæmt Teamtalk fylgjast Arsenal, Liverpool og Manchester United öll grannt með stöðu leikmannsins hjá ítalska félaginu.

Juventus er sagt tilbúið að hlusta á tilboð í hinn 26 ára gamla varnarmann þar sem félagið hyggst endurskipuleggja leikmannahóp sinn fyrir næsta tímabil. Cambiaso hefur verið fastamaður hjá Juventus og vakið athygli fyrir fjölhæfni sína, en hann getur leikið báðum megin í vörninni auk þess að sinna vængbakvarðarhlutverki.

Arsenal er talið vilja auka breiddina í varnarlínunni, Liverpool leitar að arftaka fyrir eldri leikmenn í bakvarðarstöðum og Manchester United hefur einnig áhuga á að styrkja varnarleik sinn.

Cambiaso hefur verið reglulega í ítalska landsliðinu undanfarin misseri og er talinn einn öflugasti bakvörður Serie A. Ekki liggur þó fyrir hversu hátt verð Juventus myndi setja á leikmanninn í sumar.