Alls sinntu loftför Landhelgisgæslunnar 278 útköllum árið 2018 og hafa þau aldrei verið fleiri. Í tilkynningu sem gæslan sendi frá sér kemur fram að um sé að ræða átta prósenta aukningu frá árinu 2017, en þá fóru þyrlur og flugvél stofnunarinnar í 257 útköll.
„Strax í nóvember hafði met fyrra árs fallið en á síðasta ári voru 180 sjúkir eða slasaðir fluttir með loftförunum. Helmingur þeirra voru erlendir ríkisborgarar. Útköllin hafa aukist jafnt og þétt á undanförnum árum og eru tæplega 74% fleiri en árið 2011 þegar þau voru 160. Metfjöldi útkalla ársins 2018 kemur Landhelgisgæslunni ekki á óvart ef tekið er mið af þróun síðastliðinna ára. Alls fóru loftförin TF-LIF, TF-GNA, TF-SYN og TF-SIF í 731 flugferð á árinu 2018 en flugferðirnar voru 628 árið 2017.“
