Milljónir notenda nota Google á degi hverjum, en hvað ætli hafi verið mest gúgglað árið 2018.

Í afar áhrifaríku og skemmtilegu myndbandi frá leitarvélarrisanum kemur fram að okkur mannkyninu er enn viðbjargandi því það vinsælasta er ekki slæmar og neikvæðar fréttir, heldur góðir atburðir og jákvæðar fréttir.

Í myndbandinu er farið yfir helstu atburði ársins og samkvæmt tölum Google Trends hefur aldrei áður verið gúgglað jafn oft eftir færslum sem innihalda orðið GOTT á einhvern hátt.

Dæmi um það sem gúgglað var: hvað gerir mann að góðum vini, góðum söngvara, góðum dansara, góðum borgara, góðri fyrirmynd. Með því að fara inn á Google Trends má sjá frekari upplýsingar um það sem leitað var að á árinu.

Mest var leitað að heimsmeistaramótinu í knattspyrnu sem fór fram fyrr á árinu, tónlistarmönnunum Avicii og Mac Miller, sem létust á árinu, Stan Lee skapara fjölmargra ofurhetja, en hann lést einnig á árinu og kvikmyndinni Black Panther.