Lisa Kudrow, sem fór með hlutverk Phoebe Buffay í Friends-þáttunum, fer ófögrum orðum um handritshöfunda þáttarins og segir að þeir hafi rætt opinskátt um kynferðislegar fantasíur sínar um mótleikkonur hennar, Jennifer Aniston og Courtney Cox.

Lisa er í athyglisverðu viðtali við The Times, sem Mail Online vitnar til, þar sem þetta kemur fram.

„Það var klárlega allskonar meinfýsni í gangi á bak við tjöldin,” sagði Lisa meðal annars í viðtalinu en handritshöfundarnir voru að stærstum hluta karlar.

„Ekki gleyma því að við vorum að taka upp fyrir framan 400 manna áhorfendahóp, og ef þú klikkaðir á línu frá einhverjum af þessum handritshöfundum eða fékkst ekki fullkomin viðbrögð, gátu þeir sagt hluti eins og: „Getur þessi tík ekki lesið? Hún er ekki einu sinni að reyna. Hún klúðraði línunni minni.“

Kudrow segir að Jennifer Aniston og Courteney Cox hafi verið vinsælt umræðuefni í grófum samræðum handritshöfundanna.

„Strákarnir sátu fram eftir nóttu og ræddu kynferðislegar fantasíur sínar um Jennifer og Courteney. Þetta var mjög öfgafullt,” segir Lisa sem kveðst strax hafa tekið þá ákvörðun að þeir mættu segja það sem þeir vildu um hana svo lengi sem hún heyrði ekki til.

Lisa, sem er orðin 62 ára, steig fram í viðtali við The Independent nýlega þar sem hún lýsti því að hún hafi stundum verið kölluð „sjötti vinurinn” og upplifað sig sem hálfgert aukaatriði hjá aðstandendum þáttanna.

Sjá nánar hér: Lisa Kudrow um tímann eftir Friends: „Engum var sérstaklega annt um mig“