Minna en tvær vikur eru til jóla og margir sem stytta sér stundir við að baka smákökur. Margir geta ekki beðið eftir að smákökurnar séu klárar úr ofninum og stelast í að smakka kökudeigið, en það getur verið varasamt.

Bandaríska lýðheilsustofnunin CDC varar fólk við að borða hrátt smákökudeig og eru tvær ástæður fyrir því.

Sú fyrri er að oftar en ekki eru egg í deiginu, en eins og flestir vita geta hrá egg borið með sér salmonellu sem velur alvarlegri magakveisu og dregur 450 manneskjur til dauða í Bandaríkjunum á hverju ári.

Seinni ástæðan er hrátt hveiti, sem er heldur ekkert sérstaklega gott fyrir mannslíkamann. Hrátt hveiti getur nefnilega borið með sér ýmsa sýkla, þar á meðal E. coli, en E. coli vírus sem rakinn var til hveitis gerði 63 einstaklinga veika í Bandaríkjunum árið 2016.

Af þeim sökum mælir CDC með því að bakarar haldi ró sinni og sleppi því að borða hrátt deig.