Ragga Nagli er klínískur heilsusálfræðingur og einkaþjálfari. Á Facebook heldur hún úti vinsælli síðu þar sem hún birtir reglulega pistla um hreyfingu, mataræði og fleira. Í þeim nýjasta fjallar hún um þrjú ráð til að gera hreyfingu að órjúfanlegum hluta af sjálfinu í eitt skipti fyrir öll.

Við gefum Röggu nagla orðið:

Eins og 95% mannkyns í janúar básúnaðirðu í allra eyru eftir þrettándann að hreyfa þig meira á nýju ári.

Margir ætla að sigra heiminn og keyra sig frá núlli upp í fimm æfingar á viku áður en Vísareikningur jólanna datt inn um lúguna.

En slíkt yfirþyrmandi markmið getur orðið óyfirstíganlegt strax á fyrstu vikunni og lamar þig niður í algjört aðgerðarleysi.
Allur harðsperraður. Vonlaust að púsla deginum saman og finna tíma.
Pössun. Vinna. Börnin. Makinn. Kvöldmatur.

Hér eru þrjú ráð til að gera hreyfingu að órjúfanlegum hluta af sjálfinu í eitt skipti fyrir öll.

Gerðu hreyfinguna svo auðvelda að þú getir ekki svindlað.

Til að forma nýjar venjur er best að byrja á pínkuponsulitlum breytingum á hegðun sem heilinn getur endurtakið aftur og aftur á sjálfsstýringu. Ef þú ert í núll og nix flokknum, eru fjórar CrossFit æfingar á viku óraunhæfur byrjunarreitur, og ávísun á snemmbúna uppgjöf. Í stað þess að gera 50 armbeygjur á dag – gerðu 5 armbeygjur. Í stað þess að hlaupa í hálftíma þrisvar í viku, farðu einu sinni í 10 mínútur.
Eitthvað sem þú gerir án þess að grafa djúpt í þarmana eftir viljastyrk.

Bættu við örlítilli prósentu á hverjum degi, eða í hverri viku.

Þegar þú hefur niðurneglt litla yfirstíganlega hegðun geturðu bætt agnarögn við í hverri viku. Gerðu sjö armbeygjur næstu viku. Tíu vikuna á eftir. Bættu einni hlaupaæfingu við vikuna eða lengdu tímann á æfingunni.
Áður en snjóa leysir ertu kominn upp í nokkur skipti í viku án þess að bíta sundur tunguna í sjálfsaga.

Ætlun og framkvæmd.

Rannsóknir sýna að þú ert 2-3x líklegri að hrinda ætlunum í framkvæmd ef þú gerir áætlun um hvenær, hvar, hvernig þú ætlar að æfa. “Ég mun fara í spinning tíma klukkan tíu mánudaginn 3 janúar í World Class Laugum”. Settu það í dagatalið þitt, og láttu símann minna þig á jafnt og þétt uppað viðburðinum. Þessi aðferð stóreykur líkur á að fólk byrji að æfa reglulega.