Arsenal vann flottan sigur í æfingaleik í dag er liðið mætti Lazio en þeir ensku undirbúa sig fyrir keppni í ensku úrvalsdeildinni.
Arsenal skoraði tvö mörk í kvöld en þeir Reiss Nelson og Pierre Emerick Aubameyang gerðu þau í 2-0 sigri.
Liverpool vann einnig sigur í æfingaleik í kvöld og hafði 5-0 betur gegn Napoli og miðað við þau úrslit er útlitið bjart fyrir ensk lið.
Það sama má hins vegar ekki segja um Tottenham sem mætti liði Girona frá Spáni.
Tottenham steinlá gegn spænska liðinu eftir að hafa komið yfir snemma leiks með marki frá Lucas.
Girona fór þá upp um gír og vann að lokum öruggan 4-1 sigur á Tottenham sem tefldi þó fram mörgum ungum leikmönnum.
Michel Vorm, Serge Aurier, Lucas, Ben Davies og Heung-Min Son voru helstu stjörnur Tottenham í kvöld.
