„Við erum að fara upp í 22 þúsund miða í heildina. Við vorum ekki komnir með nákvæma tölu um hversu mörgum við kæmum fyrir á vellinum út frá öryggissjónarmiðum. Núna liggur þetta fyrir og þess vegna erum við að bæta við um tvö eða þrjú þúsund miðum“ segir Jón Bjarni Steinsson tónleikahaldari.
Um alls konar miða er að ræða, bæði í stæði og stúkum og í mismunandi verðflokkum en þó minna af stúkumiðum en í stæði. Forskráning er hafin á síðunni www.show.is og kaupendur fá þá hlekk fyrir miðasöluna sem hefst snemma í næstu viku, mánudag eða þriðjudag.
Miðað við þetta eru góðar líkur á að aðsóknarmet á tónleika falli en 19 þúsund manns mættu á tónleika Justin Bieber í Kórnum í Kópavogi í september árið 2016.
„Þetta verða stærstu tónleikar sem haldnir hafa verið hérna, það er ekki spurning. Það er búið að vera uppselt á alla tónleika Guns ´n Roses á tónleikaferðalaginu sem hófst árið 2016 og þetta er orðinn fjóðri tekjuhæsti tónleikatúr sögunnar.“
Jón Bjarni segir að hljómsveitin sé í toppformi.
„Þeir eru að spila í þrjá og hálfan tíma, mættu meira að segja þremur mínútum of snemma á sviðið í Bretlandi um daginn. Þeir eru í mjög góðu formi og gerðu kröfur um að fá líkamsræktaraðstöðu á Laugardalsvelli og á hótelinu. Ég hef heyrt að allir tónleikar þeirra í Evrópu undanfarið hafi verið alveg geggjaðir.“
