Það hefur því að vonum ekki farið framhjá sænskum fjölmiðlum að rússneska þingið, Dúman, hefur nú boðið fulltrúum Alternative for Sverige (AFS) á ráðstefnu í Rússlandi. AFS er nýr flokkur og eins og nafnið gefur til kynna er flokkurinn ekki fjarri þýska flokknum Alternative für Deutschland sem er eins og AFS þjóðernissinnaður flokkur sem er andsnúinn innflytjendum og flóttamönnum.
AFS var stofnaður í desember af Gustav Kasselstrand sem var rekinn úr Svíþjóðardemókrötunum. Margir fyrrum meðlimir Svíþjóðardemókratanna hafa gengið í raðir AFS en stefna flokksins í málefnum útlendinga er mun róttækari en stefna Svíþjóðardemókratanna sem hafa oft verið gagnrýndir fyrir harða stefnu sína.
Expressen segir að yfirskrift ráðstefnunnar í Rússlandi sé framtíð þingræðisins og þróun. Meðal þeirra evrópsku flokka sem er boðið að senda fulltrúa eru Front National, Lega Nord, Alternative für Deutschland og AFS en allt eru þetta hægrisinnaðir þjóðernisflokkar. Rúmlega 500 manns taka þátt í ráðstefnunni.
Sænska ríkisútvarpið hefur eftir Gustav Kasselstrand að hann telji að Svíar eigi að bæta samskipti sín við Rússland. Þegar hann var spurður um hættuna á að hann og félagar hans verði fyrir rússneskum áhrifum á ráðstefnunni svaraði hann:
„Þetta bara kjaftæði. Hreinn hugarburður.“
Í samtali við Expressen sagði hann að ráðstefnan væri ópólitísk.
„En markmið okkar er að mynda tengsl við þjóðernisflokka frá allri Evrópu. Svíþjóðardemókratarnir hafa vanrækt þessa flokka árum saman.“
