Kostnaður við að byggja sjúkrahús við Vífilsstaði er brot af þeim fjármunum sem kröfuhafar afhentu íslenska ríkinu á síðasta ári. Þetta segir Sigmundur Davíð Gunnlaugsson þingmaður Framsóknarflokksins og fyrrverandi forsætisráðherra.

Í færslu sem hann birtir á Fésbókarsíðu sinni í dag birtir Sigmundur myndir af nýjum spítala sem verið er að byggja fyrir 300.000 manns við Herning á Vestur Jótlandi í Danmörku:

Rétt eins og á Norður Sjálandi og annars staðar er ekki verið að reyna að troða nýbyggingunum upp að gömlum spítala í miðju bæjarins. Þess í stað er byggt upp á jaðri byggðarinnar þar sem andrými er nægt, framkvæmdir trufla engan og geta gengið hratt fyrir sig á hagkvæman hátt. Sjúklingar, starfsfólk og gestir geta svo notið þess að vera í opnu, grænu og fallegu umhverfi. Byggingarnar allar nýjar og allt eins og best verður á kosið. Engin mygla,

segir Sigmundur Davíð. Sjúkrahúsið sé byggt á túni hjá Gødstrup Sø sem sé sambærilegt Vífilsstaðavatni og liggji vel við samgönguæðar:

Kostnaður er áætlaður um 50 milljarðar íslenskra króna (m.v. áætlun 2009 og gengi 2017). Sjálfsagt verður þetta eitthvað dýrara en hvað sem því líður verður það aldrei nema brot af því sem kröfuhafar afhentu íslenska ríkinu á síðasta ári, eða þá af því sem við spöruðum á að láta ekki undan fjárkúgunum á þar-síðasta kjörtímabili. Með öðrum orðum: Við höfum efni á að gera þetta á Íslandi. En höfum við efni á að gera það ekki?