Í morgun var þingfest fyrir Héraðsdómi Reykjavíkur mál Flokks fólksins á hendur Tryggingastofnun ríkisins.

Það snýst um það að eldri borgarar telja að þeir eigi allt að fimm milljarða króna í ógreiddum ellilífeyri frá ríkinu fyrir janúar og febrúar á þessu ári.

Greint var frá þessu máli hér á Eyjunni þann 30. mars síðastliðinn. Málavextir eru þeir að þann 1. janúar 2017 tóku gildi breytingar á lögum um almannatryggingar nr. 100/2007. Breytingarnar felldu úr gildi heimildina til að skerða greiðslur Tryggingastofnunar til eldri borgara vegna áunninna réttinda þeirra úr lífeyrissjóði. Nemur þessi skerðing allt að 2,5 milljörðum króna á mánuði.

Sjá frétt: Flokkur fólksins fer fyrir málaferlum gegn ríkinu

Tryggingastofnun ákvað hins vegar að hunsa gildandi lög með því að greiða ekki samkvæmt þeim, heldur lét Velferðarráðuneytið vita af málinu í lok janúar. Þá virðist hafa farið í gang mikill feluleikur hjá stjórnvöldum til að breiða yfir það sem þau töldu mistök. Síðan samþykkti Alþingi afturvirkar breytingar á almannatryggingalögunum þar sem allt að fimm milljarða réttindi ellilífeyrisþega fyrir mánuðina janúar og febrúar voru afnumin. Komið hefur fram að það var Velferðaráðuneytið sem samdi frumvarpið sem sviptir eldri borgara áunnum réttindum þeirra afturvirkt.

Stjórn Flokks Fólksins samþykkti einróma að höfða mál gegn ríkinu fyrir hönd eldri borgara.

Jón Steinar Gunnlaugsson hæstaréttarlögmaður og fyrrum hæstaréttardómari fer fyrir málinu. Við erum bjartsýn á að sigur vinnist,

segir Inga.

Vinnist sigur mun ríkið þurfa að greiða tugþúsundum ellilífeyrisþega allt að fimm milljarða króna skerðingar frá í janúar og febrúar með dráttarvöxtum. Margir munu bíða spenntir eftir niðurstöðunni sem gæti hleypt af stað fleiri málaferlum gegn ríkinu en mikil reiði kraumar undir niðri meðal margra vegna óréttlætis sem fólk telur sig beitt í lífeyrismálum.