Yfir 600 manns hafa sett nafn sitt á undirskriftasöfnun þar sem brottvikningu Kristjáns Þorbjörnssonar er mótmælt.
„Viðbrögðin hafa komið mér í opna skjöldu og eru varla verðskulduð en mér þykir vænt um þetta. Fólki líkar auðsjáanlega ekki svona vinnubrögð,“ segir Kristján Þorbjörnsson, yfirlögregluþjónn á Blönduósi, sem vikið var frá störfum í síðasta mánuði, inntur eftir þeim viðbrögðum sem brottvikningin hefur vakið.
Undirskriftasöfnun þar sem uppsögn Kristjáns er mótmælt er á netinu og þegar þetta er skrifað hafa rúmlega 600 manns skrifað undir. Stefnt er að því að færa Sigríði Á. Andersen dómsmálaráðherra undirskriftirnar þegar nöfnin ná eitt þúsund talsins.
Flekklaus ferill
Á síðu undirskriftasöfnunarinnar kemur fram að uppsögn Kristjáns sé valdníðsla af verstu gerð. Kristjáni hafi verið sagt upp eftir 36 ára farsælt starf, fáum mánuðum fyrir eftirlaunaaldur. Geir Jón Þórisson, fyrrverandi yfirlögregluþjónn, tók í svipaðan streng í grein á visir.is þar sem hann sagði fordæmalaust þegar æviskipuðum yfirlögregluþjóni með flekklausan feril sé vikið frá störfum þegar svo skammt sé í starfslok. Ástæða uppsagnar er hagræðing innan embættisins.
