Meirihluti Íslendinga eru ánægðir með nágranna sína, eða 87,8%. Þetta kom fram í niðurstöðum könnunar MMR þar sem svarendur voru spurðir hversu ánægðir eða óánægðir þeir væru með nágranna sína. Einungis 12,1% Íslendinga voru óánægðir með nágranna sína og þar af voru 4,8% mjög óánægðir. Athygli vekur að stuðningsfólk Pírata var óánægðara með nágranna sína en stuðningsfólk annarra stjórnmálaflokka, eða 18,5%. Stuðningsfólk Samfylkingarinnar var hins vegar ánægðast með nágranna sína, en 97% þeirra sögðust ánægð með granna sína.
Óánægja með nágranna hefur aukist um 5,1% síðan mælingar hófust árið 2010. Þegar þróun á afstöðu Íslendinga frá árinu 2010 til 2016 er skoðuð kemur í ljós að ánægja með nágranna hefur verið nokkuð stöðug. Óánægja með nágranna virðist þó aukast yfir tímabilið, eða um 5,1 prósentustig síðan mælingar hófust í ágúst 2010.
Eldra fólk ánægðara með nágranna sína
Íslendingar voru misánægðir með nágranna sína eftir lýðfræðihópum. Ef munur á viðhorfi eftir aldurshópum var skoðaður kom í ljós að því eldri sem svarendur voru því ánægðari voru þeir með nágranna sína. Þannig voru 81,1% svarenda á aldrinum 18-29 ára ánægðir með nágranna sína, á móti 96,7% svarenda á aldrinum 68 ára og eldri. Jafnframt voru svarendur með heildartekjur undir 400 þúsund óánægðari en svarendur í öðrum tekjuflokkum, eða 19,4%.
Könnunin var gerð dagana 15. til 18. ágúst 2017, 955 einstaklingar 18 ára og eldri svöruðu.
