Ásmundur Einar Daðason félags- og jafnréttismálaráðherra hefur ráðið Arnar Þór Sævarsson, fráfarandi sveitarstjóra á Blönduósi aðstoðarmann sinn í velferðarráðuneytinu.

Arnar Þór útskrifaðist úr lögfræði frá Háskóla Íslands árið 1999 og tók ári síðar réttindi til að gegna lögmennsku. Hann hefur gegnt stöðu sveitarstjóra á Blönduósi frá árinu 2007. Áður var hann aðstoðarmaður Jóns Sigurðssonar, þáverandi formanns Framsóknarflokksins, þegar hann var iðnaðar- og viðskiptamálaráðherra 2006 – 2007. Árin 2002 til 2006 starfaði Arnar sem lögfræðingur hjá Símanum og sem lögfræðingur hjá Fjármálaeftirlitinu árin 1999 – 2002.

Arnar Þór mun á næstunni sinna afmörkuðum verkefnum fyrir ráðherra samhliða störfum sveitarstjóra en kemur að fullu til starfa í velferðarráðuneytinu í vor. Arnar Þór er annar tveggja aðstoðarmanna Ásmundar. Hinn aðstoðarmaðurinn er Sóley Ragnarsdóttir.

Arnar Þór er fæddur árið 1971. Maki hans er Gerður Beta Jóhannsdóttir, hjúkrunarfræðingur og deildarstjóri á Landspítala. Þau eiga saman þrjú börn; Arnar Frey 22ja ára, Ásrúnu Ingu, 11 ára og Eyrúnu Önnu 8 ára.