Sæll Óttar.
Mér líður eins og þú þurfir betri útskýringar á því hvernig netið er notað í dag. Þetta viðhorf þitt minnti mig einungis á það hversu mikilvægt það er að gera stafrænt kynferðisofbeldi skýrlega bannað með lögum, svo að það sé á kristaltæru að dreifing kynferðislegra einkamynda án samþykkis einstaklinga sem á þeim birtast er óásættanleg og aldrei í lagi.
Það er heldur aldrei í lagi að færa skömm yfir á brotaþola og það er nákvæmlega það sem þú ert að gera þarna. Sem þekktur geðlæknir ættir þú að átta þig á því að stöðu þinni innan samfélagsins fylgja völd, völdum fylgir síðan ábyrgð. Þú hefur sterka rödd í samfélaginu og ég tel þig vera að nota hana vitlaust.
Hefur þú kynnt þér afleiðingar þess að verða fyrir stafrænu kynferðisofbeldi? Ég er nokkuð viss um að þú myndir huga betur að orðum þínum ef svo væri.
Ef að einhver samþykkir að sofa hjá þér, þá er hann ekki að samþykkja að sofa hjá ölllum vinum þínum, líkt og Margrét Erla kemur inn á í örskýringu stafræns kynferðisofbeldis hér.
Að sama skapi þá er aðili sem deilir kynferðislegri einkamynd af sér með öðrum aðila, ekki að samþykkja dreifingu myndarinnar.
Endilega hittu mig í kaffi á háskólasvæðinu við tækifæri ef þú skilur þetta illa og vantar fleiri upplýsingar. Ég set hér með smá lesefni fyrir þig um stafrænt kynferðisofbeldi.
Dreifing kynferðislegra mynd án samþykkis er glæpur – En er það skýrt í lögum?
Og hér er síðan skýrsla sem ég vann fyrir Kvenréttindafélagið, Stöðvum hrelliklám: Löggjöf og umræða.
Kveðjur.
Vigdís Fríða, félags- og kynjafræðinemi.
