Kórónan er þung fyrir samfélagsmiðladrottninguna Selenu Gomez. Hún er með flesta fylgjendur á Instagram, heilar 113 milljónir fylgjenda.

Um leið og ég varð manneskjan með flesta fylgjendur á Instagram þá fríkaði ég eiginlega út. Ég var orðin svo gagntekin af þessu. Ég vaknaði við þetta og sofnaði við þetta. Ég var fíkill, og mér fannst eins og ég væri að sjá hluti sem ég vildi ekki sjá, eins og ég væri að setja hluti í hausinn á mér sem ég vildi ekki hugsa um. Það endaði alltaf með að mér leið ömurlega þegar ég skoðaði Instagram,

sagði söngkonan í viðtali fyrir apríl útgáfu Vogue. „Þess vegna er ég eiginlega undir ratsjánni, er smá draugur.“

Selena eyddi Instagram forritinu úr símanum sínum og veit ekki lykilorðið að aðganginum sínum. Aðstoðarmaðurinn hennar setur myndir á Instagram fyrir hennar hönd. Ákvörðunin um að segja skilið við samfélagsmiðillinn var eftir að hún fór í meðferð 2016.

Fólk vildi svo mikið að ég væri sönn og ekta, og þegar það gerðist, loksins, þá létti það mikið af mér. Ég er ekki öðruvísi heldur en það sem ég set þarna út. Ég hef verið berskjölduð með aðdáendum mínum og segi stundum hluti sem ég ætti ekki að segja. En ég verð að vera hreinskilin við þá. Mér finnst það vera stór ástæða af hverju ég er hér.

Selena ákvað að leita sér hjálpar og fór í meðferð eftir að hafa aflýst Revival tónleikaferðalaginu síðasta sumar.

Tónleikaferðalög eru mjög einmanalegur staður fyrir mig. Sjálfstraustið mitt var ónýtt. Ég var þunglynd og kvíðin. Ég byrjaði að fá kvíðaköst rétt áður en ég fór á svið eða strax eftir að ég kom af sviðinu. Í grundvallaratriðum þá leið mér eins og ég væri ekki nógu góð, að ég væri ekki hæf. Mér fannst eins og ég væri ekki að gefa aðdáendum mínum neitt, og þeir gætu séð það – sem ég held að hafi verið algjör brenglun.

Selena aflýsti yfir 30 tónleikum til að einbeita sér að heilsunni sinni og var í meðferð í 90 daga. Það hjálpaði henni að fara úr sviðsljósinu í smá tíma og býr hún núna í Airbnb húsnæði í Valley. Hún segist ekki fara oft út úr húsi nema langa bíltúra með vinum sínum.

Ég held að svona 17 manns eru með símanúmerið mitt núna, kannski tveir eru frægir.