Deilan er sögð hafa snúist um hvort hefja ætti hernaðaraðgerðir að nýju gegn írönskum stjórnvöldum eða halda áfram diplómatískum viðræðum.
Samkvæmt fréttinni telur Netanjahú að litlar líkur séu á því að áframhaldandi samningaviðræður við írönsk yfirvöld leiði til samkomulags og vill hann að hernaðaraðgerðir hefjist á nýjan leik.
Trump er hins vegar sagður vilja leggja meiri áherslu á samkomulag sem fæli í sér að Íranar hættu kjarnorkuáætlun sinni áður en gripið yrði aftur til hernaðaraðgerða.
Samkvæmt frétt Daily Mail átti símtalið sér stað aðeins nokkrum klukkustundum eftir að New York Times greindi frá því að Ísraelar hefðu, með samþykki Bandaríkjastjórnar, undirbúið áætlun um stjórnarskipti í Íran á fyrstu dögum stríðsins.
Samkvæmt umfjöllun blaðsins fólst áætlunin meðal annars í því að gera Mahmoud Ahmadinejad, fyrrverandi forseta Írans, að nýjum leiðtoga landsins eftir að Ayatollah Ali Khamenei hefði verið felldur í loftárásum Ísraela.
Ekki hefur verið staðfest opinberlega að slík áætlun hafi verið til staðar og bandarísk stjórnvöld hafa ekki tjáð sig um málið.
New York Times segir að áformin hafi runnið út í sandinn strax á fyrsta degi átakanna þegar Ahmadinejad særðist í árás Ísraela á heimili hans í Teheran. Árásin hafi átt að losa hann úr stofufangelsi, en síðan hafi ekkert spurst til hans opinberlega.
