Sigurður Hannesson, framkvæmdastjóri Samtaka iðnaðarins, segir að ákvörðun peningastefnunefndar Seðlabankans um að hækka vexti þyngi enn frekar rekstur fyrirtækja og stöðu heimila.

Hækkunin sem tilkynnt var um í morgun var þó viðbúið viðbragð Seðlabankans við þrálátri og versnandi verðbólguhorfum, að mati Sigurðar.

Hann skrifar pistil um málið á vef samtakanna þar sem hann segir það mikil vonbrigði að þrátt fyrir háa vexti spái Seðlabankinn nú yfir 5% verðbólgu að meðaltali á árinu á sama tíma og hagkerfið er að kólna, hagvöxtur veikist og atvinnuleysi eykst.

„Þessi staða undirstrikar að Seðlabankinn má ekki standa einn í baráttunni við verðbólguna. Ríki, sveitarfélög og aðilar vinnumarkaðarins þurfa öll að leggjast á eitt til að ná niður verðbólgu og skapa skilyrði fyrir lægri vexti,“ segir hann.

Samtök iðnaðarins hafa kallað eftir þjóðarsátt sem er að mati samtakanna bæði nauðsynleg og möguleg gegn þrálátri verðbólgu. Í því samhengi þurfi stjórnvöld að tryggja fyrirsjáanleika í rekstrarumhverfi fyrirtækja og halda aftur af íþyngjandi ákvörðunum.

Staða efnahagsmála hér á landi einkennist nú af hægum hagvexti, vaxandi atvinnuleysi, þrálátri verðbólgu og háum vöxtum. Verðbólguhorfur hafa versnað þrátt fyrir framleiðsluslaka í þjóðarbúinu. Í pistlinum á vef SI kemur fram að þetta sýni að vandinn verði ekki leystur með peningastefnunni einni saman. Næstu mánuðir skipti jafnframt miklu máli á vinnumarkaði og launaþróun þurfi að styðja við hjöðnun verðbólgu og stöðugleika fram á veginn.

Sjá greinina í heild sinni hér.