Endrick segir að framtíð sín í knattspyrnunni ráðist af því „sem Guð segir eiginkonu minni“ eftir að brasilíski framherjinn hélt áfram að skora fyrir lánsfélag sitt Lyon um helgina.

Endrick, sem er 19 ára gamall og á mála hjá Real Madrid, skoraði eitt marka Lyon í 4-2 sigri gegn Rennes á sunnudag. Sigurinn kom liðinu upp í Meistaradeildarsæti í frönsku deildinni.

Framherjinn hefur farið á kostum síðan hann kom til Lyon á láni í janúar, en hann hefur skorað átta mörk og lagt upp sjö til viðbótar á þeim tíma.

Eftir leikinn var Endrick spurður út í framtíð sína, en hann fór á lán eftir að hafa átt erfitt með að fá tækifæri hjá Real Madrid í kjölfar 51 milljón punda félagaskipta sinna. Hann byrjaði aðeins níu leiki fyrir spænska stórliðið á fyrstu 18 mánuðum sínum hjá félaginu.

„Ef mér er ætlað að vera hér áfram, snúa aftur til Real Madrid eða fara eitthvert annað, þá geri ég það sem Guð segir mér. Það sem Guð segir eiginkonu minni,“ sagði Endrick í viðtali við Globo.

Hann hrósaði jafnframt Lyon fyrir móttökurnar og sagði félagið hafa hjálpað sér mikið í baráttunni um sæti í brasilíska HM-hópnum.

Endrick og eiginkona hans, Gabriely Miranda, greindu nýverið frá því að þau ættu von á sínu fyrsta barni. Parið giftist árið 2024, innan við ári eftir að þau kynntust.