Burnley er á barmi falls úr ensku úrvalsdeildinni og getur orðið annað liðið til að falla í kvöld.

Wolves féll endanlega með jafntefli Crystal Palace og West Ham í fyrradag en Burnley fylgir þeim niður með tapi gegn Manchester City, sem er alls ekki ólíklegt að verði raunin.

Falli Burnley ekki í kvöld mun það án efa gerast á næstu vikum, en liðið er 13 stigum frá öruggu sæti þegar fimm leikir eru eftir.

Töluvert harðari fallbarátta er svo á milli liðanna fyrir ofan Wolves og Burnley, en Tottenham, West Ham og Nottingham Forest berjast um að forðast að fara niður með þeim.